Benvenuti nel sito di Giuseppe Pungitore, dell'ing. Vincenzo Davoli, di Mimmo Aracri ed Antonio Limardi, punto d'incontro dei navigatori cibernetici che vogliono conoscere la storia del nostro meraviglioso paese, ricco di cultura e di tradizioni: in un viaggio nel tempo nei ruderi medioevali. Nella costruzione del sito, gli elementi che ci hanno spinto sono state la passione per il nostro paese e la volontà di farlo conoscere anche a chi è lontano, ripercorrendo le sue antiche strade.

ORAZIONE A S. FOCA MARTIRE

 

Santu Foca quandu era l’infidili

ed era de la curti bon sordatu,

venia nu juornu e pensau a la fidi

e de nuostru Signuri fu toccatu.

Pua dassau l’armi e cuminciau a patira

a chiju puntu vozza vattijatu;

de pua se vozza fara nu giardinu

e tutti l’alimenti avia chiantatu,

avia chiantatu fuigghi e petrusinu,

paria lu paradisu rigistratu.

Agenta nda passava de continu,

li rifriscava e non volia pagatu

e jia passandu n’agenta riunda,

Santu Foca ci vozza addimandari:

“agenti duva jati a’ ssu pendinu?”

“Na bona ndulgienza avimu e fara”;

“Chiaviti e fara a mia dicitimilu,

quarche nderizzu vi porria dunari”;

“Cercamu a Foca e non lu canuscimu,

ca lu patrunu lu vo castigara”;

“Nàtami tiempu finu a lu matinu,

ca vi lu fazzu avira nta li mani;

stasira vuogghju assiemi mu mangiamu,

c’è puru nu buonu liettu pe dormira”.

Ficìa mangiari triccientu persuni

De chija rrobba chi sapia cercara;

dopu pranzu cacciaru lu vurzuni

a Santu Foca volienu pagari,

iju nci dissa: “vi su servituri,

la rrobba non la tiegnu pe dinari”.

“La rrobba non la tiegnu pe dinari,

l’aju acquistata cu li mia suduri:

lu paradisu mi vuogghju acquistara”.

Quandu fu juornu dissaru partimu:

“Duv’è l’amicu chi tu n’hai de dara?”,

“Eccu! Si mi voliti cchiu vicinu:

io sugnu Foca ch’haju fattu mala”.

Tutti chiji sordati stupidiru.

Unu cu natru sincignaru a guardara

“ca nui cu quala cora lu tradimu,

ni dunau de viviri e mangiari,

puru nu buonu liettu pe dormira”.

“Ligatimi si maviti e ligari

pe mmia nommu ndaviti richiamuri

ca mmia li strazi mi sugnu favuri”.

E lu trattaru de parti civili

e lu ligaru cu lu maccaturi.

A li mani ci miseru lli nguanti

A li peda catini e ferramenta.

Pua quantu furu a chija curti stanti

li primi duoni furunu li turmienti.

De pua spediru triccientu persuni

pe chiji vosca mu ajjhunu animali

e hannu trovatu vipari e scurpiuni

serpenti ed ogni sorta d’animali.

De pua pigghiaru morteja e picuni

na scura fossa vozzaru scavara.

Pua pigghiaru u nuostru Protetturi

nta chija scura fossa lu calaru.

Tutti chiji animali s’appartaru

e unu chi ndavia lu cchiù maggiuri

si lu tenia impugnatu nta li mani.

Cu la testuzza si venia a nchinara

cu la lingua nci liccava li suduri.

All’uottu juorni li sordati jiru

mu vidanu s’è muortu o s’era vivu.

Quandu chija scura fossa l’apriru

vittaru splendori e jiornu chiaru.

Tutti chij miraculi scriviru

a lu luoru patruni li mandaru.

Vui jativinda o sbirri e malandrini cacciatulu chissu è magaru.

E l’hannu misu supa ngrolisinu

pe tutta la città lu girijaru

a la chiesi de Roma lu trasiru

a l’ataru maggiuri lu posaru

lu Santu Papa lu benediciu

e cu li mani sua l’incurunau

a Francavija ni lu cunduciu.

O Francavija felice e biata

mo chi l’aviti stu Santu abbucatu

potiti caminara vosca e strati

pegura de nimali non teniti.

De pesta e terremota liberati

particulari li vuostri divuoti.

Calici d’uoru e calici d’argienti

o Santu Foca mio vi l’appresientu.

Si non vi dassu quantu v’ammeritati

o Santu Foca mio mi perdunati.

Mi perdunati cuomu peccaturi

cuomu perduna a vui nuostru Signuri.

Si fina la raziuoni e non va chijù

o Santu Foca mio vi la dissamu a vui.

 

Torna alla PAGINA DI SAN FOCA

Inno a S. Foca Martire

testo: sac. Giovanni di Biagio